सातारा : जिल्हा पोलिस दलात कार्यरत असलेल्या एका पोलिस कर्मचाऱ्याच्या घरातील वाद पोलिस ठाण्यात आला आहे. ‘त्या’ बाईशी संबंध ठेवायचे, असेल तर तू माझ्याकडे येऊ नको, असे पत्नीने सांगितल्याने संतप्त झालेल्या पोलिस कर्मचाऱ्याने ‘मी आता ‘त्या’ बाईला घरी आणणारच. तुला बघून घेतो,’ अशी धमकी दिली. या प्रकारानंतर पोलिस पत्नीने शाहूपुरी पोलिस ठाण्यात तक्रार दाखल केली.

पोलिसाच्या पत्नीने दिलेल्या तक्रारीनुसार, त्यांचा पती जिल्हा पोलिस दलात कार्यरत असून, त्यांच्या पतीचे एका महिलेशी अनैतिक संबंध आहेत. यावरून त्यांच्यात वाद सुरू आहेत. त्या बाईशी संबंध ठेवायचा असेल तर तू माझ्याकडे येऊ नकाे, असे पत्नीने पतीला सांगितले. तसेच माझी आई आणि सासूनेही पतीला तू त्या बाईचा नाद सोडला पाहिजे, असे सांगितले. या रागातून संबंधित पोलिस कर्मचाऱ्याने दोघींनाही हाताने मारहाण केली. मी आता त्या बाईला घरी आणणारच. तुला बघून घेतो, अशी धमकी देऊन त्यांनी शिवीगाळ केली असल्याचे पोलिस कर्मचाऱ्याच्या पत्नीने आपल्या तक्रारीत म्हटले आहे. यावरून पोलिसांनी संबंधित पोलिस कर्मचाऱ्यावर दि. ३१ रोजी अदखलपात्र गुन्हा दाखल केला आहे. पोलिस उपनिरीक्षक अजित जगदाळे हे अधिक तपास करीत आहेत.