पुसेसावळी  : (ता. खटाव) येथील सामाजिक व राजकीय क्षेत्रातील एक ज्येष्ठ आणि आदराचे व्यक्तिमत्त्व, खटाव पंचायत समितीचे माजी उपसभापती चंद्रकांत शंकरराव कदम (पाटील) यांचे वयाच्या ६५ व्या वर्षी अल्पशा आजाराने दुःखद निधन झाले. 'दादा' या टोपणनावाने अत्यंत परिचित असलेल्या चंद्रकांत दादांच्या जाण्याने पुसेसावळी गावासह संपूर्ण खटाव तालुक्यावर शोककळा पसरली आहे.

खटाव पंचायत समितीचे उपसभापती म्हणून त्यांनी उल्लेखनीय काम केले. आपल्या पदाचा वापर नेहमीच सर्वसमान्य जनतेचे प्रश्न सोडवण्यासाठी केला. अत्यंत शांत, संयमी आणि संवेदनशील लोकप्रतिनिधी म्हणून त्यांची ओळख होती. सुख-दुःखात धावून जाणारा नेता हरपल्याने तालुक्याने एक अजातशत्रू व्यक्तिमत्त्व गमावले आहे.

पुसेसावळी ग्रामपंचायतचे माजी सरपंच सुर्यकांत पाटील (सुरेश बापू), सेवानिवृत्त शिक्षक संभाजी पाटील यांचे ते ते बंधू होते. विद्यमान पंचायत समिती सदस्य संग्राम पाटील यांचे ते वडील होत. त्यांच्या पश्चात वृद्ध आई, भाऊ, पत्नी, मुलगी, मुलगा, सून आणि नातवंडे असा मोठा परिवार आहे. कदम पाटील कुटुंबाचा मुख्य आधारवड कोसळल्याने परिवारावर दुःखाचा डोंगर कोसळला आहे. अंत्यसंस्कार आज शनिवार, १३ जून रोजी दुपारी ४:०० वाजता पुसेसावळी येथे करण्यात येणार आहेत. रक्षाविसर्जन रविवार, १४ जून रोजी पुसेसावळी येथे सकाळी आयोजित करण्यात आले आहे.