सातारा : जून महिना संपत आला, तरी जिल्ह्यातील १६ गावांना टँकरद्वारे पाणीपुरवठा होत आहे. पावसाने दडी मारल्याने दुष्काळग्रस्त भागातील गावे व वाड्यावस्त्यांमध्ये पाणीटंचाई निर्माण झाली आहे. त्यामुळे जिल्ह्यातील सहा तालुक्यांत एकूण १२ टॅंकर सुरू आहेत.
गेल्या वर्षी पाऊस चांगला झाल्याने एप्रिल महिन्यापर्यंत पाण्याची कुठलीही टंचाई निर्माण झाली नव्हती. मात्र, यंदा उष्णतेची लाट आल्याने पाण्याची पातळी खालावली गेली. त्यातच उन्हाळी पाऊस पाहिजे तेवढ्या प्रमाणात न झाल्याने दुष्काळी भागातील परिस्थिती अधिकच बिकट झाली. त्यामुळे जिल्ह्यातील काही तालुक्यात एप्रिल महिन्यापासून पाण्याचे टॅंकर सुरू करण्यात आले. सुरुवातीला पाणीपुरवठा करणाऱ्या टँकरची संख्या अधिक होती. मात्र, सद्यःस्थितीत टँकरची संख्या कमी करण्यात आली आहे.
दरम्यान, जून महिना उजाडला तरी पावसाने दडी मारली आहे. त्यामुळे जिल्ह्यातील माण, वाई, पाटण, जावळी, सातारा व कऱ्हाड तालुक्यांतील सहा शासकीय व सहा खासगी टँकरद्वारे पाणीपुरवठा केला जात आहे. यामध्ये माण तालुक्यात सहा टँकर, वाई दोन, पाटण एक, जावळी दोन, सातारा दोन व कऱ्हाड तालुक्यात दोन असे बारा टँकर सुरू आहेत. सहा तालुक्यांतील १६ गावे व ३६ वाडी-वस्त्यांमध्ये पाणीटंचाई निर्माण झाली आहे. त्यामुळे प्रशासनामार्फत अद्यापही तेथे टँकरने पाणीपुरवठा सुरू आहे.