देशमुखनगर : पुणे बंगलोर महामार्गावर शेंद्रे (ता. सातारा) गावच्या हद्दीत सातारा ते कराड जाणारे लेनवर चारचाकी वाहनाच्या धडकेत एक वानर गंभीर जखमी झाले. वनविभागाच्या रेस्क्यु टीमकडून तात्काळ वैद्यकीय मदत मिळाल्याने त्यास जीवदान मिळाले.
या घटनेबाबतची अधिक माहिती अशी,आज दि. १ रोजी शेंद्रे गावच्या हद्दीत गावाकडून डोंगराच्या दिशेने वानरांचा एक कळप चालला होता. महामार्ग ओलांडताना त्या कळपातील एका वानरास चारचाकी वाहनाची जोरदार धडक बसली. त्याच दरम्यान दै. प्रभातचे नागठाणे प्रतिनिधी विजय घोरपडे तिथुन प्रवास करत होते. त्यांच्या ध्यानात ही घटना येताच तिथे थांबुन त्यांनी वनविभागास तात्काळ संपर्क साधुन जखमी वानराची माहिती दिली. उप-वनसंरक्षक महादेव मोहिते, वनाधिकारी निवृत्ती चव्हाण ,वनसंरक्षक कुशल पावरा यांच्या मार्गदर्शना खाली वनरक्षक राजु मोसलगी यांनी तात्काळ वनविभागाची रेस्क्यु टीम घटनास्थळाकडे रवाना केली. रेस्क्यु टीमचे पशुवैद्यकीय डॉक्टर लोकेश रिटे यांच्यासह पवन शिरतोडे ,ओमकार ढाले हे अपघातस्थळी पोहचले व जखमी वानरास ताब्यात घेतले. वानरावर योग्य ते उपचार करून बरे झाल्यावर त्याला नैसर्गिक अधिवासात सोडणार असल्याची माहिती उप-वनसंरक्षक महादेव मोहिते यांनी सांगितले. चारचाकी वाहनचालक मोहन जाधव यांनी ही मोलाचे सहकार्य केले.
प्रकाश शिंदे
