सातारा : सद्यस्थितीत सुरू असलेल्या जातीयवादी घडामोडींच्या संदर्भाने सामाजिक प्रसार माध्यमांवर पोलिसांचे बारीक लक्ष आहे. बोरगाव पोलीस ठाण्याकडूनही अशा प्रकारच्या सर्व माध्यमांवर लक्ष ठेवले जात असून, कार्यक्षेत्रातील नागरिकांनीही या कामी सहकार्य करावे, असे आवाहन बोरगाव पोलीस ठाण्याचे सहायक पोलीस निरीक्षक रवींद्र तेलतुंबडे यांनी केले आहे.
  रवींद्र तेलतुंबडे यांनी पुढे म्हटले आहे की, कोणीही कोणत्याही समाजाच्या भावना दुखावणारे तसेच भडकावू किंवा शांतता भंग करणे, दोन धर्मामध्ये तेढ निर्माण होईल असे आक्षेपार्ह संदेश, छायाचित्रे, छायाचित्रीकरण यांची शहनिशा न करता सामाजिक प्रसार माध्यमावर ती माहिती प्रसारित करू नये. बोरगाव पोलीस दलामार्फत फेसबूक, इन्स्टाग्राम, ट्विटर, व्हाट्सअप इत्यादी सामाजिक प्रसार माध्यमावर देखरेख करण्यात येत असून त्यावर बारकाईने लक्ष ठेवण्यात येत आहे.