महाबळेश्वर :महाबळेश्वरच्या पर्यटन व्यवसायाला आणि शहराच्या प्रतिमेला जाणीवपूर्वक धक्का देण्याचा एक मोठा कट रचला जात असल्याचा गंभीर आरोप नगराध्यक्ष सुनील शिंदे यांनी केला आहे. सोशल मीडियाचा गैरवापर करून किरकोळ घटनांना अतिरंजित स्वरूप देत संपूर्ण महाबळेश्वरची बदनामी केली जात असल्याचा आरोप करत त्यांनी या प्रकरणामागील छुप्या शक्तींचा शोध घेण्याची मागणी केली आहे.

नगराध्यक्ष शिंदे यांनी प्रश्न उपस्थित केला की, महाबळेश्वरमध्ये वाहतूक, पार्किंग, टोल किंवा पर्यटकांशी संबंधित किरकोळ समस्या यापूर्वीही होत्या आणि सोशल मीडिया देखील अस्तित्वात होता. मग गेल्या एक-दोन वर्षांत अचानक महाबळेश्वरविरोधी नकारात्मक प्रचाराचे प्रमाण एवढे वाढले कसे? यामागे नेमका कोणाचा अजेंडा काम करत आहे, याचा शोध घेणे आवश्यक असल्याचे त्यांनी म्हटले आहे.

यावेळी त्यांनी अत्यंत खोचक सवाल उपस्थित करत, “जुन्या महाबळेश्वरची प्रतिमा मलिन करून ‘नवीन महाबळेश्वर’ प्रकल्पाला लोकप्रिय करण्याचा प्रयत्न सुरू आहे का?” असा प्रश्न विचारला. आधीच महाबळेश्वर आणि क्षेत्र महाबळेश्वर अशी दोन स्वतंत्र ओळख असताना तिसऱ्या प्रकल्पाला पुन्हा ‘नवीन महाबळेश्वर’ हे नाव देण्यामागचा हेतू काय, असा सवाल त्यांनी उपस्थित केला.

महाबळेश्वर शहरातील अनेक मूलभूत समस्या आजही कायम असताना, रस्ते, पार्किंग, पाणीपुरवठा आणि पर्यटन सुविधांसाठी निधीची गरज असताना कोट्यवधी रुपयांचा निधी नवीन प्रकल्पाकडे वळवला जात असल्याबद्दलही त्यांनी नाराजी व्यक्त केली. “जुन्या महाबळेश्वरच्या विकासाकडे दुर्लक्ष करून नवीन प्रकल्पाला प्राधान्य का दिले जात आहे?” असा थेट सवाल त्यांनी शासन आणि संबंधित यंत्रणांना केला.

दरम्यान, काही पर्यटकांशी झालेल्या किरकोळ वादांच्या घटना, टोलनाक्यांवरील तक्रारी किंवा स्थानिक प्रश्नांचे व्हिडिओ सोशल मीडियावर मोठ्या प्रमाणावर व्हायरल करून ‘बॉयकॉट महाबळेश्वर’ सारखे ट्रेंड निर्माण केले जात असल्याचा आरोपही त्यांनी केला. काही व्यक्ती किंवा गट संपूर्ण शहराची प्रतिमा खराब करण्यासाठी योजनाबद्ध पद्धतीने नकारात्मक वातावरण निर्माण करत असल्याची शंका त्यांनी व्यक्त केली.

नगराध्यक्ष सुनील शिंदे यांनी महाबळेश्वरकर, व्यापारी, हॉटेल व्यावसायिक आणि पर्यटन क्षेत्राशी संबंधित सर्व घटकांना एकत्र येण्याचे आवाहन केले आहे. “महाबळेश्वर हे केवळ पर्यटनस्थळ नाही, तर हजारो कुटुंबांच्या उदरनिर्वाहाचे साधन आहे. शहराची बदनामी करणाऱ्या कोणत्याही कटाविरुद्ध एकजुटीने उभे राहणे ही काळाची गरज आहे,” असे ते म्हणाले.

खोचक सवाल

• महाबळेश्वर बदनाम करून ‘नवीन महाबळेश्वर’ला चमकवण्याचा डाव कोणाचा?

• सोशल मीडियावर सतत व्हायरल होणाऱ्या नकारात्मक मोहिमांचा सूत्रधार कोण?

• जुन्या महाबळेश्वरच्या विकासाला डावलून नवीन प्रकल्पांना प्राधान्य का?

• पर्यटन राजधानीची प्रतिमा मलिन करण्यामागे आर्थिक आणि राजकीय स्वार्थ दडले आहेत का?

• महाबळेश्वरचे नाव वापरून नवीन ब्रँड उभा करण्यासाठी जुन्या शहराची प्रतिमा जाणीवपूर्वक खराब केली जात आहे का?