सातारा : साताऱ्यात अल्पवयीन मुलीवर अत्याचार करुन तिला गर्भवती केल्याप्रकरणी युवकावर पोक्सो अंतर्गत गुन्हा दाखल असतानाच शहर पोलिसांनी कॅफे चालक व त्यावरील कर्मचाऱ्यालाही सहआरोपी केले आहे. स्वीट कपल असे कॅफेचे नाव असून तो सेव्हन स्टार बिल्डींगमध्ये आहे. दरम्यान, पोलिसांनी केलेल्या कारवाईने कॅफे चालकांचे धाबे दणाणले आहेत.ओंकार बाळासो साळुंखे (वय १९, रा. देगाव ता.सातारा) असे अत्याचार केलेल्या युवकाचे नाव असून त्याला याअगोदर अटक झालेली आहे. प्रतीक राजेंद्र कांबळे (वय २५) व पुष्कर सुधीर साबळे (दोघे रा. शिवथर ता. सातारा) असे कॅफे मालक व कर्मचाऱ्याचे नाव आहे.

याबाबत अधिक माहिती अशी, सातारा तालुक्यातील अल्पवयीन मुलीचा पाठलाग करुन ओंकार साळुंखे याने मुलीवर अत्याचार केले. या घटनेत मुलगी गर्भवती राहिल्यानंतर सातारा शहर पोलिस ठाण्यात ओंकार विरुध्द गुन्हा दाखल करण्यात आला. शहर पोलिसांचा तपास सुरु असताना सातारा एसटी स्टॅन्ड परिसरात असलेल्या सेव्हन स्टार बिल्डींगमधील स्वीट कपल कॅफेमध्ये पिडीत मुलीवर अत्याचार झाल्याचे तपासात समोर आले. यामुळे तपासी अधिकारी यांनी कॅफे मालक व त्यावरील चालकालाही सहआरोपी केले. कॅफे मालक प्रतीक कांबळे याला पोलिसांनी अटक केली तर त्यावरील कर्मचारी पुष्कर साबळे हा पसार झाला आहे. कॅफे मालक व चालकाने कॅफेमधील संशयिताला गैरकृत्य वरील मजल्यावर करण्यास अपप्रेरणा दिल्याचे पोलिस तपासात समोर आल्याने पोलिसांनी त्यानुसार कारवाई केली. दरम्यान, गेल्या दीड महिन्यांपूर्वी देगाव फाट्यावरील कॅफे मालका विरुध्दही पोक्सोचा गुन्हा दाखल करण्यात आला आहे. त्यानंतर पोलिसांनी कॅफे चालकांना रडारवर घेवून कॅफे कसे असावेत? याबाबतची सूचना करण्यात आली. असे असतानाच आणखी एका कॅफे मालकालाही पोक्सोच्या गुन्ह्यात सहआरोपी केल्याने व्यवसायिकांचे धाबे दणाणले आहेत.