मुंबई : सायन रेल्वे स्थानकात गुरुवारी (ता. २७) सकाळी फलटण उपजिल्हा रुग्णालयातील डॉ. राजेंद्र रुपनवर या डॉक्टरने टॉवरवर चढून टोकाचे पाऊल उचलण्याचा प्रयत्न केल्याने काही काळ गोंधळाचे वातावरण निर्माण झाले. नोकरीवरून काढून टाकल्याच्या निषेधार्थ हे पाऊल उचलल्याची प्राथमिक माहिती आहे.

घटनेची माहिती मिळताच मुंबई पोलिस आणि अग्निशमन दलाच्या पथकांनी तातडीने घटनास्थळी पोहोचून बचावकार्य सुरू केले.सकाळी सुमारे पावणे आठ ते आठच्या दरम्यान सायन स्थानकातील हाय व्होल्टेज टॉवरवर एक व्यक्ती चढल्याचे पोलिसांना समजले. परिस्थितीचे गांभीर्य लक्षात घेऊन पोलिसांनी त्याच्याशी संवाद साधत खाली येण्याचे आवाहन केले. मात्र, त्याने टॉवरवरच टोकाचे पाऊल उचलण्याचा प्रयत्न केला.यानंतर पोलिस आणि अग्निशमन दलाच्या जवानांनी तत्काळ कारवाई करत त्या व्यक्तीला सुरक्षितपणे खाली आणले.

सदर व्यक्ती डॉ. राजेंद्र रुपनवर असल्याची माहिती समोर आली असून त्याची प्रकृती गंभीर असल्याचे लक्षात आल्यानंतर जवानांनी तातडीने CPR देऊन प्राथमिक वैद्यकीय मदत केली. या प्रयत्नांमुळे संबंधित व्यक्तीचा जीव वाचवण्यात यश आले.

                                                                              नोकरीवरून काढल्याचा राग

फलटण उपजिल्हा रुग्णालयातील डॉ. राजेंद्र रुपनवर या डॉक्टरवर वैद्यकीय प्रमाणपत्र वेळेत सादर न केल्याने त्याला नोकरीवरून काढण्यात आले होते.

नोकरीवरून झालेल्या कारवाई विरोधात त्याने सायन रेल्वे स्थानकातील टॉवरवर चढून आपला निषेध व्यक्त करण्याचा प्रयत्न केला. त्याला पुन्हा कामावर घेण्यात यावे आणि आपल्यावर अन्याय करणाऱ्या संबंधितांवर कठोर कारवाई करावी, अशी त्याची मागणी असल्याचे समोर आले आहे.

या प्रकारामुळे सायन रेल्वे स्थानक परिसरात काही काळ तणावपूर्ण परिस्थिती निर्माण झाली होती. मात्र, पोलिस आणि अग्निशमन दलाच्या वेळीच झालेल्या हस्तक्षेपामुळे परिस्थिती नियंत्रणात आली.बचावानंतर संबंधित डॉ. राजेंद्र रुपनवर यांना पुढील उपचारासाठी रुग्णालयात दाखल करण्यात आले आहे. या घटनेमागील बाबींचा पोलीस अधिक तपास करत आहेत.