पुसेसावळी : पुसेसावळी येथील महावितरणचे वरिष्ठ तंत्रज्ञ तानाजी धुमाळ यांच्या कार्यपद्धतीवर गंभीर प्रश्नचिन्ह निर्माण करणारा प्रकार समोर आला आहे. पूर्वसूचना नाही, लेखी नोटीस नाही, ग्राहकाची संमती नाही आणि पंचनाम्याची प्रतही नाही, अशा परिस्थितीत वडिलोपार्जित घरातील वीज मीटर काढून नेल्याचा आरोप ग्राहकाने केला असून, याप्रकरणी बागवान यांनी औंध पोलिसांकडे लेखी तक्रार दाखल केली आहे.
धक्कादायक बाब म्हणजे, संबंधित घराचे वीज कनेक्शन सुरू असून मीटरची स्थिती ‘नॉर्मल’ असतानाही तो हटविण्यात आल्याचे तक्रारीत नमूद आहे. शिवाय ₹४,२१० रुपयांचे वीज बिल ऑनलाइन भरल्याचा पुरावाही तक्रारदाराने जोडला आहे. त्यामुळे थकबाकीच्या कारणावरून कारवाई झाली असल्यास, त्यासाठी अधिकृत आदेश कोणाचा होता, हा प्रश्न ऐरणीवर आला आहे.
मीटर काढताना वर्क ऑर्डर अथवा जॉब कार्ड होते का? पंचनामा झाला का? रीडिंग व सील क्रमांक नोंदविण्यात आला का? काढलेले मीटर कुठे जमा केले? ग्राहकाला याची लेखी माहिती देण्यात आली का? या बाबींची तपासणी करण्याची मागणी करण्यात आली आहे. तक्रारीनुसार, या कारवाईत तानाजी धुमाळ यांच्यासह विजय जाधव सहभागी असल्याचे तक्रारदाराने नमूद केले असून, संबंधित सर्व व्यक्तींचे जबाब घेण्याची मागणी आहे.
मीटर महावितरणच्या मालकीचे असले तरी ग्राहकाच्या घरातून तो हटविताना नियमित प्रक्रिया आणि अधिकृत आदेशाचे पालन झाले का, हे तपासणे महत्त्वाचे आहे. कागदोपत्री नोंदी नसल्यास कारवाईचा अधिकार कोणत्या आधारावर वापरण्यात आला, याचा छडा पोलिसांनी लावावा, अशी मागणी आहे.
पोलिसांनी हे प्रकरण केवळ ‘महावितरणची अंतर्गत बाब’ म्हणून न पाहता स्वतंत्र तपास करून सत्य बाहेर आणावे, अशी अपेक्षा व्यक्त होत आहे. मीटर कोणी काढला, कोणाच्या आदेशाने, कुठे नेला आणि सध्या त्याची नोंद कुठे आहे, याचा तपास होऊन अनधिकृतता आढळल्यास संबंधितांवर कायदेशीर कारवाई करावी, अशी मागणी तक्रारदाराने केली आहे.
तक्रारीच्या प्रती गृह विभागाचे सचिव, पोलीस महासंचालक, विशेष पोलीस महानिरीक्षक कोल्हापूर, जिल्हाधिकारी सातारा, जिल्हा पोलीस अधीक्षक सातारा आणि उपविभागीय पोलीस अधिकारी दहिवडी कॅम्प वडूज यांना ईमेलद्वारे पाठविण्यात आल्या आहेत.
आता प्रश्न एकच—मीटर काढण्याचा अधिकृत आदेश होता तर तो दाखवा; पंचनामा झाला असेल तर तो कुठे आहे; आणि मीटर अधिकृतरीत्या हटविला असेल तर तो सध्या कुठे आहे? या प्रश्नांची उत्तरे पोलिस तपासातून समोर येण्याची प्रतीक्षा आहे.
आशपाक बागवान.
