सातारा : आम आदमी पार्टीच्या सातारा जिल्हा समन्वयकपदी सरदार (सागर) भोगांवकर यांची विविध मान्यवरांच्या उपस्थितीत नियुक्ती करण्यात आली.
महाराष्ट्राचे प्रभारी गोपाल इटालिया यांच्या मार्गदर्शनाखाली आणि संघटनमंत्री संदीप देसाई यांच्या अध्यक्षतेखाली सातारा जिल्हा आम आदमी पक्षाच्या कार्यालयात पक्ष कार्यकारीणीसंदर्भात बैठक घेण्यात आली. त्यावेळी जिल्हाध्यक्ष शिवाजी जाधव, उपजिल्हाध्यक्ष रतन पाटील, महेंद्र बाचल, सचिव निवृत्ती शिंदे, प्रसिद्धी प्रमुख मारुती जानकर, जिल्हा खजिनदार विजयकुमार घोतमल, जिल्हा संघटक ऍड. धीरज जाधव यांची प्रमुख उपस्थिती होती.
यावेळी बोलताना संदीप देसाई म्हणाले, भोगांवकर यांनी आम आदमी पक्षाचे काम करीत असताना पक्षाची ध्येय, धोरणे सातारा जिल्ह्यातील तळागाळात पोहोचवली आहेत. त्यांचा जनसंपर्क आणि लोकांना आपलेसे करण्याचे कसब याचा विचार करता सरदार (सागर) भोगांवकर यांची जिल्हा समन्वयकपदी नियुक्ती करण्याबाबत वरिष्ठांशीही चर्चा करण्यात आली आहे.
त्यानुसार या बैठकीत प्रस्ताव मांडण्यात आला. याला एकमुखाने सर्वांनी पाठींबा दर्शवला. त्यामुळे सरदार (सागर) भोगांवकर यांची सातारा जिल्हा समन्वयकपदी निवड झाल्याचे जाहीर करण्यात आले.
यावेळी बोलताना भोगांवकर म्हणाले, आगामी काळात सर्वसामान्यांना डोळ्यासमोर ठेवून पक्षादेशाप्रमाणे वाटचाल करणार आहे. येत्या निवडणुकांमध्ये आम आदमी पार्टी आपली ताकद नक्कीच दाखवेल. जनशक्ती अभियानांतर्गत तालुकानिहाय दौरा प्रस्तावित करण्यात आला असून या माध्यमातून सातारा जिल्ह्यातील तालुक्यांसह खेडी-पाडी, वाड्या-वस्त्यांपर्यंत आम आदमी पक्षाची ध्येय धोरणे पोहोचविण्याचे काम करणार आहे. महिनाभरातच आम आदमी पक्षाच्या कार्यकर्त्यांमध्ये आणखी पन्नास हजार कार्यकर्त्यांची भर पडणार असल्याचा विश्‍वासही त्यांनी यावेळी व्यक्त केला.
यावेळी संदीप माने, अतुल भोसले, सयाजी पाटील, अनिकेत खताळ, रवींद्र मांडवे आदी उपस्थित होते.