सातारा : सोनवडी तालुका फलटण येथे एका आदिवासी महिलेवर सामूहिक अत्याचार झाल्याची घटना उघडकीस आल्याने खळबळ उडाली आहे. या घटनेची गंभीर दखल महाराष्ट्र विधान परिषदेच्या उपसभापती डॉक्टर नीलम गोऱ्हे यांनी घेतली आहे. या प्रकरणातील प्रमुख आरोपीला शोधून याला अटक करण्यात यावी, सदर महिलेला मनोधैर्य योजनेअंतर्गत मदत देण्यात यावी तसेच संबंधित आरोपींवर आवश्यक कलमे लावून लवकरात लवकर चार्जशीट दाखल करण्यात यावे, अशी मागणी त्यांनी पत्रकाद्वारे केली आहे.
नीलम गोऱ्हे यांनी प्रसिद्ध केलेल्या पत्रकात नमूद आहे की, सोनवडी येथे सामूहिकपणे महिलेवर बलात्कार करण्यात आल्याची घटना 19 जून रोजी घडली आहे. या प्रकरणात तिच्या मुलांना आणि पतीला डांबून ठेवण्यात आले. 7 जुलै 2023 रोजी फलटण ग्रामीण पोलीस स्टेशनला तक्रार दाखल करण्यात आली आहे. या भट्टीवर काम करणारे कामगार कातकरी समाजातील आहे. ही घटना माणुसकीला काळीमा फासणारी आहे. सदर प्रकरणामध्ये महिला व बालकल्याण विभागाकडून ठोस उपाययोजनांची कार्यवाही होणे आवश्यक आहे. जिल्हास्तरावर महिला दक्षता कमिटी आहे. अशीच कमिटी गाव पातळीवर नेमण्यात यावी आणि त्या अधिक सक्षम होण्याकरता त्यांना प्रशिक्षण मिळावे.

एकूण पाच आरोपी होते, असे पिडीत स्त्रीचे म्हणणे आहे. त्या पाच आरोपींना कसे ओळखता येईल? याबाबतचा जो तपशील आहे तो तिला समुपदेशन करून त्याची समितीमार्फे नीट माहिती घेण्यात यावी. तिचा धीर वाढवून त्याबद्दलचे आणखी पुरावे कसे मिळतील ? याकरिता प्रयत्न होणे गरजेचे आहे. या संदर्भात तपासी अधिकाऱ्यांना योग्य आदेश देण्यात यावेत. या प्रकरणाचा मुख्य सूत्रधार कोण ? तसेच या घटनेचा छडा लागू नये म्हणून पुरावा नष्ट करण्याचा प्रकार झाला का, याबाबत पोलिसांनी तपास करावा. आरोपींवर आवश्यक कलमे लावून त्यांच्यावर त्वरित लवकरात लवकर चार्जशीट दाखल करण्यात यावी. आरोपींना जामीन मिळणार नाही याकरता चांगला वकील द्यावा. सदर महिलेला मनोधैर्य योजनेअंतर्गत मदत मिळण्याकरता प्रयत्न करावा.