सातारा- करंजे गावातील सर्व प्रकारच्या समस्यांचा निपटारा करण्यासाठी आपण नेहमीच प्रयत्न केले असून येथील समस्या सोडवण्यासाठी प्राधान्य दिले आहे. करंजे व आसपासच्या परिसरात अनेक प्रकारची विकासकामे मार्गी लावली असून विकासाची प्रक्रिया पुढेही अखंडित ठेवणार आहे. करंजे भागाच्या विकासासाठी आपण कुठेही कमी पडणार नाही, असा शब्द आ. श्रीमंत छ. शिवेंद्रसिंहराजे भोसले यांनी दिला. 

करंजे येथे आ. शिवेंद्रसिंहराजेंच्या पाठपुराव्यातून आणि विशेष निधीतून मंजूर झालेल्या करंजे कमान ते भैरवनाथ पटांगण ते झेंडा चौक, गणेश भोसले घर ते कुंभार घर गिरण, रघुनाथ पुरा, गोलपार, तोडकर कॉलनी, बसप्पा पेठ येथील अंतर्गत रस्त्यांच्या कामाचा शुभारंभ मोठ्या उत्साहात करण्यात आला. याप्रसंगी आ. शिवेंद्रसिंहराजे बोलत होते. यावेळी गंगाधर फडतरे सर, जगन्नाथ किर्दत, अतुल चव्हाण, अमर इंदलकर- पाटील, बाळासाहेब भुजबळ, प्रलय शेटे, राजाराम पवार, आनंद शेंडे, निखिल भोसले, रविराज किर्दत, अजय इंदलकर, प्रणय किर्दत, गणेश भोसले यांच्यासह विविध मान्यवर आणि ग्रामस्थ उपस्थित होते. 

करंजे येथील रस्त्यांसाठी सातत्याने निधी उपलब्ध करून देण्यात आला आहे. येथील समस्या सोडवण्यासाठी कधीही निधीची कमतरता भासू दिली नाही. येथील कर्यकर्ते आणि ग्रामस्थांच्या मागणीनुसार अनेक प्रकारची विकासकामे मार्गी लावली असून यापुढेही उर्वरित विकासकामे मार्गी लावण्यासाठी निधी उपलब्ध करून दिला जाईल, असे आ. शिवेंद्रसिंहराजे याप्रसंगी म्हणाले.