दहिवडी : सामाजिक वनीकरणाच्या महिला वनपरिक्षेत्र अधिकारी यांना अश्लील शिवीगाळ करुन सरकारी काम करत असताना धमकी दिल्याप्रकरणी दिडवाघवाडीचे (ता. माण) माजी सरपंच बाळू काळेवर गुन्हा दाखल करण्यात आला आहे.

याबाबत पोलिसांकडून मिळालेली माहिती अशी, दिडवाघवाडी गावात सामाजिक वनीकरण विभागामार्फत मंजूर करण्यात आलेले वृक्ष लागवडीचे काम सुरु करण्यात येत होते. सदरचे काम मी मंजूर करुन आणलेले असताना मला न विचारता कसे करत आहात असे म्हणत गावाचे माजी सरपंच बाळासाहेब किसन काळे यांनी सामाजिक वनीकरणाच्या वनपरिक्षेत्र अधिकारी भाग्यश्री ठाकूर यांना मोबाईल वरुन अश्लील शिवीगाळ केली तसेच काम कसे करता तेच बघतो, तुम्हाला आठ दिवसांत कळेलच अशी धमकी दिली.

या घटनेनंतर भाग्यश्री ठाकूर यांनी बाळासाहेब काळे यांच्या विरोधात दहिवडी पोलिस ठाण्यात दिलेल्या तक्रारीमध्ये असे म्हणण्यात आले आहे की. दिडवाघवाडी ग्रामपंचायत हद्दीमध्ये वृक्ष लागवडीचे काम सुरू असताना दिडवाघवाडी गावचे माजी सरपंच बाळासाहेब किसन काळे त्या ठिकाणी गेले आणि तेथे काम करत असलेल्या कर्मचाऱ्यांना शिवीगाळ व धमकी दिली की काम बंद करा. मला विचारल्याशिवाय काम सुरू करायचे नाही. असे सांगून त्या वेळेस काम बंद पाडले. सदरचे काम बंद का केले खा जाब विचारण्यासाठी वनपरिक्षेत्र अधिकारी भाग्यश्री ठाकूर यांनी त्यांना ऑफिसला बोलावून जाब विचारला असता त्यांनी सांगितले की मी दिडवाघवाडी चा सरपंच असताना हे काम मंजूर करण्यासाठी प्रस्ताव दिला होता. त्यामुळे हे काम मला विचारात न घेता तुम्ही कसे सुरू केले आणि मला विचारल्याशिवाय काम सुरू केले तर याद राखा. तालुक्यामध्ये तुम्ही कसे काम करताय तेच बघतो. आठ दिवसांमध्ये तुम्हाला दाखवतो. अशी धमकी देऊन ऑफिसमधून निघून गेले.
        त्यानंतर दिडवाघवाडी च्या हद्दीत झाडे लावण्याचे काम दिलेले शिंगणापूर गावचे दादासाहेब बाळू शिंगाडे यांनी बाळासाहेब किसन काळे यांना त्यांच्या फोन वरून फोन लावला असता त्यांनी वन परिक्षेत्र अधिकारी भाग्यश्री ठाकूर यांना अर्वाच्य भाषेत शिवीगाळ केली. व तालुक्यात कसे काम करते ते दाखवतो. भाग्यश्री ठाकूर यांचे पती सूर्यभान जाधव यांनादेखील शिवीगाळ करत म्हणाले की बायकोचा जास्त पुळका येतोय तर घरी ठेवायची अशा प्रकारची धमकी व शिवीगाळ केला कारणास्तव दहिवडी पोलीस ठाणेमध्ये  गुन्हा दाखल करण्यात आला आहे. पोलिस उपनिरीक्षक देवानंद तुपे या गुन्ह्याचा अधिक तपास करत आहेत.