खंडाळा : पुणे-सातारा महामार्गावरील  खंबाटकी घाटात  आज पहाटे साडेतीन वाजण्याच्या सुमारास महामार्गाच्या रस्त्यावर ऑइल सांडल्याने अनेक वाहनांची घसरगुंडी झाली. मात्र, सुदैवाने कोणतीही जीवितहानी झाली नाही. परंतु, यात गाड्यांचे किरकोळ नुकसान झाले आहे.

याबाबत माहिती अशी, की आज पहाटे घाटातील भैरवनाथ मंदिराजवळ  असणाऱ्या वळणावर एका गाडीचे ऑइल किमान 100 मीटर अंतरावर पसरले. यामुळे या मार्गावरील वाहतूक विस्कळीत झाली. तर, काही गाड्या घसरून कठड्यास धडकल्या. यात गाडींचे किरकोळ नुकसान झाले.

मात्र, कसलीही जीवितहानी झाली नाही. दरम्यान, महामार्ग पोलीस व खंडाळा पोलिसांनी घटनास्थळी भेट देऊन सिंगल लेन वाहतूक सुरू केली. या घाटात सकाळपासून सिंगल लेन वाहतूक सुरळीतपणे सुरू आहे. विकेंड असल्याने रस्त्यावर वाहनांची मोठी गर्दी पहायला मिळत आहे. दरम्यान, आज सकाळी खंडाळा शहरातील टँकर व अग्निशामक यंत्रणा यांना बोलून रस्त्यावर पाणी मारण्यात आले. मात्र, तरीही रस्ता निसरडाच राहिला आहे. यानंतर दुपारी या महामार्गावर माती टाकून रस्ता साफ करण्याचे काम सुरू होते. यासाठी महामार्ग पोलिसांनी मोठी मेहनत घेतली.