सातारा : ग्राम विकास मंत्री आमदार जयकुमार गोरे यांच्यावर आरोप करणाऱ्या सातारा शहरातील महिलेला सातारा शहर पोलिसांनी खंडणी प्रकरणी अटक केली आहे. आज सकाळी ही कारवाई करण्यात आली असून. सातारा शहर पोलीस व स्थानिक गुन्हे शाखेच्या सहकार्याने ही कारवाई करण्यात आली.

 एक कोटी रुपये खंडणी घेत असताना महिलेला पकडण्यात आल्याची माहिती आहे. ग्रामविकास मंत्री जयकुमार गोरे यांनी साताऱ्यातील एका महिलेला मानसिक त्रास दित अश्लील फोटो पाठवल्याचा आरोप राज्यसभेचे खासदार व शिवसेना प्रवक्ते संजय राऊत यांनी केला होता. विधानसभेच्या अधिवेशनामध्ये सुद्धा या प्रकरणाचे मोठे पडसाद उमटले होते. या प्रकरणी त्याचे वृत्तांत करणारे एका पत्रकाराला सुद्धा अटक झाली होती. 

सदर महिलेने जयकुमार गोरे यांच्यावर आरोप करत माध्यमांना मुलाखती देत विधानसभेच्या पायऱ्यावर उपोषण करणार असल्याचे सांगितलं होतं. मात्र, शुक्रवारी सकाळी सातारा शहर पोलीस आणि स्थानिक गुन्हे शाखेच्या पथकाने या महिलेला 1 कोटीची खंडणी घेताना अटक केली आहे. सदर महिलेने या प्रकरणी तीन कोटी रुपयांची खंडणी मागितल्याचा आरोप करण्यात आला होता. हे प्रकरण मिटवण्यासाठी एक कोटी रुपये स्वीकारत असतानाच सातारा पोलिसांनी ही कारवाई केल्याने एकच खळबळ उडाली आहे. 

या महिलेला राहत्या घरातून अटक करण्यात आल्याची माहिती आहे. या कारवाई संदर्भात सातारा पोलिसांनी बोलण्यास नकार दिला आहे