कोरेगाव : राज्यात गेल्या आठ ते दहा दिवसांपासून सुरू असलेल्या सत्तासंघर्षाचा समारोप काल महविकास आघाडीचे मुख्यमंत्री उद्धव ठाकरे यांनी दिलेल्या राजीनाम्याने झाला. त्यानंतर उपमुख्यमंत्री आणि मंत्रिमंडळ सदस्यांच्या नावांची चर्चा सुरू आहे. या मंत्रिमंडळात महेश शिंदे यांचा नक्की समावेश होईल, असा कार्यकर्त्यांना व जनतेला विश्वास वाटतो.

महाराष्ट्राच्या संभाव्य नवीन मंत्रिमंडळात एकनाथ शिंदे यांचे खंदे समर्थक आमदार महेश शिंदे यांची वर्णी लागणार, असा ठाम विश्वास त्यांच्या कार्यकर्ते व कोरेगाव विधानसभा मतदारसंघातील जनतेत दिसून येत आहे.

महेश शिंदे हे मूळचे भाजपचे. त्यांनी पाच ते साडेपाच वर्षांपूर्वी कोरेगाव मतदारसंघात बांधणी करण्यास सुरुवात केली. त्यात त्यांना चांगले यश मिळाले. मात्र, प्रत्यक्षात विधानसभा निवडणुकीवेळी शिवसेना-भाजप युतीत त्यांना कोरेगाव मतदारसंघ हा सेनेचा असल्याने शिवबंधन बांधून सेनेच्या चिन्हावर निवडणूक लढवावी लागली. दोन्ही पक्षाच्या कार्यकर्त्यांनी काम करून त्यांना विजयीही केले. त्यानंतर सेना-भाजप युती तुटून महाविकास आघाडी सत्तेवर आली. महेश शिंदे यांनी आघाडी धर्म पाळत पहिल्या दिवसापासून सर्व कार्यकर्त्यांना बरोबर घेऊन कोट्यवधींचा निधी मिळवून विकासकामे सुरू ठेवली. तालुक्याची विकासाची घोडदौड सुरू झाल्याने कार्यकर्ते, जनता समाधान व्यक्त करू लागली.

कोरेगाव मतदारसंघात गेल्या ३२ महिन्यांच्या कालावधीत कोविड काळात स्वखर्चाने उभारलेले कोविड उपचार केंद्र, त्याद्वारे हजारो गोरगरीब रुग्णांवर केलेले मोफत उपचार, राजकीय प्रतिकूल स्थिती असतानाही आपल्या कुशल कौशल्याने मतदारसंघातील विविध विकासकामांसाठी खेचून आणलेला निधी, त्यात त्यांना सत्तासंघर्षाचे प्रमुख एकनाथ शिंदे यांची लाभलेली मदत, स्वतः जनता आणि कार्यकर्त्यांशी निर्माण केलेले जिव्हाळ्याचे नाते व एकनाथ शिंदे यांच्याशी त्यांनी व्यक्तिगत ठेवलेले बंधूमित्रासारखे जिव्हाळ्याचे संबंध लक्षात घेता महेश शिंदे यांची मंत्रिमंडळात वर्णी लागेल, असा कार्यकर्ते, जनता विश्‍वास व्यक्त करत आहेत.