सातारा : पतीने मागितलेले पैसे देण्यास नकार दिल्याने चिडलेल्या पतीने पत्नीच्या अंगावर स्टोव्ह मधील डिझेल टाकून तिला पेटवण्याचा प्रयत्न केल्याचा खळबळजनक प्रकार रामकुंड, ता. जि. सातारा येथे घडला आहे. हा प्रकार 9 मे रोजी दुपारी तीनच्या दरम्यान घडला.

याबाबत पोलिसांनी दिलेली माहिती अशी, याप्रकरणी नेहा सुरज माने वय 23 राहणार रामकुंड तालुका जिल्हा सातारा यांनी सातारा शहर पोलीस ठाण्यात फिर्याद दिली आहे. सुरज राजू माने यांच्या विरोधात गुन्हा दाखल करण्यात आला असून त्यांना अद्याप अटक करण्यात आलेली नाही. सुरज माने यांनी आपल्या पत्नीकडे काही कारणास्तव पैसे मागितले. पैसे नसल्याचे सांगितल्याने चिडलेल्या सुरज माने यांनी चिडून जाऊन पत्नीच्या अंगावरच स्टोव्हमधील डिझेल टाकून काडीने पेटवले. फिर्यादीने आरडाओरडा केल्याने आरोपीने फिर्यादीच्या अंगावर पाणी ओतले.

या आगीमध्ये फिर्यादीच्या गालाला व दोन्ही पायाला भाजले. फिर्यादी स्वतः रिक्षाने सिव्हिल हॉस्पिटल येथे उपचारासाठी दाखल झाल्या. त्यानंतर त्यांनी सातारा शहर पोलीस ठाण्यात पतीविरुद्ध तक्रार दिली आहे. उपविभागीय पोलीस अधिकारी राजीव नवले यांनी घटनास्थळी भेट देऊन माहिती घेतली. सहाय्यक पोलीस निरीक्षक ए. आय. शितोळे अधिक तपास करत आहेत.