सातारा, : सातारा शहर पोलिस, वडूज पोलिस आणि स्थानिक गुन्हे शाखेने संयुक्तरीत्या केलेल्या धडक कारवाईत बेकायदेशीररित्या साठवून ठेवलेला व विक्रीसाठी आणलेला स्फोटक पदार्थांचा मोठा साठा जप्त केला आहे. या दोन स्वतंत्र कारवायांमध्ये एकूण १८ लाख ९५ हजार ३५८ रुपयांचा मुद्देमाल जप्त करण्यात आला असून, तिघा आरोपींना अटक करण्यात आली आहे. आणखी एका संशयिताचा पोलिसांकडून शोध सुरू आहे.

पोलिस अधीक्षक निखिल पिंगळे व अपर पोलिस अधीक्षक डॉ. वैशाली कडूकर यांच्या मार्गदर्शनाखाली ही कारवाई करण्यात आली.

शहर पोलिसांची कारवाई

सातारा शहर पोलिसांनी दगडी खाण परिसरात छापा टाकून शिवराज बलदेव चौधरी (रा.खिंडवाडी ता. सातारा, मूळ राजस्थान) याच्याकडून बेकायदेशीर स्फोटकांचा साठा जप्त केला. तपासादरम्यान त्याच्याकडून ४८० किलो अमोनियम नायट्रेट, २,४२३ जिलेटीन कांड्या आणि १,९५० डिटोनेटर्स असा सुमारे १ लाख ८५ हजार २५८ रुपयांचा मुद्देमाल हस्तगत करण्यात आला. या प्रकरणी शहर पोलिस ठाण्यात गुन्हा दाखल करून आरोपीला अटक करण्यात आली आहे.

वडूज पोलिसांची संयुक्त कारवाई

दरम्यान, स्थानिक गुन्हे शाखा आणि वडूज पोलिसांनी मायणी परिसरात टाटा ट्रक व दोन बोलेरो वाहनांवर छापा टाकला. वाहनांमधून ९,८०० जिलेटीन कांड्या, विविध प्रकारचे डिटोनेटर्स, कॉर्डेक्स वायर व सेफ्टी फ्यूज असा सुमारे १७ लाख १० हजार १०० रुपयांचा स्फोटकसाठा जप्त करण्यात आला.

या कारवाईत विशाल जाट आणि बाबूलाल जाट यांना अटक करण्यात आली असून, शंकर बेनीराम चौधरी हा संशयित फरार असून त्याचा शोध सुरू आहे.

तपास सुरू

दोन्ही गुन्ह्यांमधील आरोपींचा परस्पर संबंध उघडकीस आला असून, त्यांच्याकडून बेकायदेशीर स्फोटकांची वाहतूक व विक्रीचे मोठे रॅकेट उघड होण्याची शक्यता पोलिसांनी व्यक्त केली आहे. या प्रकरणाचा पुढील तपास सातारा शहर पोलिस, वडूज पोलिस व स्थानिक गुन्हे शाखेकडून सुरू आहे.

सदर कारवाई श्री. निखिल पिंगळे, पोलीस अधीक्षक, सातारा व श्रीमती डॉ. वैशाली कडूकर, अपर पोलीस अधीक्षक, सातारा, यांच्या मार्गदर्शनाखाली मा. उपविभागीय पोलीस अधिकारी सो., सातारा विभाग राजीव नवले, स्थानिक गुन्हे शाखेचे श्री. विश्वजीत घोडके, सातारा शहर पोलीस ठाण्याचे पोनि. सचिन म्हेत्रे, सातारा तालुका पोलीस ठाणे पोनि. निलेश तांबे तसेच वडूज पोलीस स्टेशनचे श्री. धनश्याम सोनवणे, स्थानिक गुन्हे शाखा, सातारा शहर पोलीस ठाणे व सातारा तालुका पोलीस ठाणे डी.बी. पथकातील अंमलदार, बीडीडीएस पथक आणि फॉरेन्सिक युनिटने सहभाग घेतला. उत्कृष्ट कामगिरीबद्दल पोलिस अधीक्षक निखिल पिंगळे यांनी संपूर्ण पथकाचे अभिनंदन केले आहे.