सातारा : खुनाच्या गुन्ह्यात शिक्षा भोगत असताना पॅरोल रजेवर सुटून तब्बल चार वर्षांपासून फरार असलेल्या भरत कांतीलाल ओसवाल (रा. गुलमोहर कॉलनी, शाहूपुरी, सातारा) याला स्थानिक गुन्हे शाखेच्या पथकाने शाहूपुरी चौकातून अटक केली. त्याला पुढील कारवाईसाठी शाहूपुरी पोलीस ठाण्याच्या ताब्यात देण्यात आले आहे.

भरत ओसवाल हा खुनाच्या गुन्ह्यात शिक्षा भोगत असून, १४ मे २०२० रोजी ४५ दिवसांच्या पॅरोल रजेवर कोल्हापूर मध्यवर्ती कारागृहातून बाहेर आला होता. कोविड-१९ काळात त्याने टप्प्याटप्प्याने रजा वाढवून घेतली. मात्र, १९ मे २०२२ रोजी कारागृहात परत हजर राहणे बंधनकारक असतानाही तो परतला नाही. त्यामुळे त्याच्याविरुद्ध शाहूपुरी पोलीस ठाण्यात भारतीय न्याय संहितेअंतर्गत (पूर्वीच्या भादंवि कलम १७२ व २२४) गुन्हा दाखल करण्यात आला होता.

पोलीस अधीक्षक निखील पिंगळे आणि अपर पोलीस अधीक्षक डॉ. वैशाली कडुकर यांच्या मार्गदर्शनाखाली पोलीस निरीक्षक विश्वजीत घोडके यांनी फरार आरोपीचा शोध घेण्यासाठी विशेष पथक स्थापन केले होते. आरोपी सतत ठिकाणे बदलत असल्याने त्याचा माग काढणे पोलिसांसमोर मोठे आव्हान होते. गुप्त माहिती, नातेवाईक व मित्रांच्या हालचालींवर ठेवलेल्या लक्षामुळे अखेर १ जुलै रोजी तो शाहूपुरी चौकात असल्याची माहिती पोलिसांना मिळाली.

त्यानुसार स्थानिक गुन्हे शाखेच्या पथकाने तातडीने कारवाई करत भरत ओसवाल याला ताब्यात घेतले. त्यानंतर त्याला पुढील कायदेशीर प्रक्रियेसाठी शाहूपुरी पोलीस ठाण्याच्या स्वाधीन करण्यात आले.

ही कारवाई पोलीस निरीक्षक विश्वजीत घोडके यांच्या नेतृत्वाखाली पोलीस अंमलदार अतिश घाडगे, संजय शिर्के, विजय कांबळे, शरद बेबले, लैलेश फडतरे, प्रविण फडतरे, अविनाश चव्हाण, सुजित भोसले, पृथ्वी जाधव, रोहित निकम आणि महेश निर्मळ यांनी केली. या यशस्वी कारवाईबद्दल पोलीस अधीक्षक निखील पिंगळे आणि अपर पोलीस अधीक्षक डॉ. वैशाली कडुकर यांनी पथकाचे अभिनंदन केले.