पाटण  : कोयना धरणांतर्गत विभागासह पाटण तालुक्यात विश्रांती घेतलेक्या पावसाने पुन्हा एकदा दमदार सुरुवात केल्याने कोयना धरणात मोठ्या प्रमाणात पाण्याची आवक सुरू झाली आहे. सध्या धरणात प्रतिसेकंद सरासरी २३ हजार ४५६ क्युसेक्स पाण्याची आवक होत आहे. १०५.२५ टीएमसी पाणी साठवण क्षमता असलेल्या या धरणात सध्या ९३.४५ टीएमसी पाणीसाठा झाल्याने धरण पूर्ण क्षमतेने भरण्यासाठी आता केवळ ११.८० टीएमसी इतक्याच पाण्याची गरज आहे.
     दरम्यान , पावसाचे प्रमाण असेच सुरू राहीले तर पुन्हा एकदा कोयना धरणाच्या वक्र दरवाज्यातून पाणी सोडावे लागण्याची शक्यता आहे.
           गेल्या काही दिवसांपासून धरणांतर्गत विभागात पावसाने पूर्णपणे उघडीप दिली होती. कडक उन्ह पडल्याने पाऊस गायब झाला की काय असा प्रश्न पडला होता. गतवर्षीप्रमाणे कोयना धरण याही वर्षी भरणार का? असा प्रश्न निर्माण झाला होता. मात्र दोन दिवसांपासून पुन्हा  दमदार पाऊस पडत असल्याने धरण पाणीसाठ्यात अपेक्षित वाढ होत आहे. धरणात सध्या एकूण उपलब्ध ९३.४५ टीएमसी पैकी उपयुक्त ८८.३३ टीएमसी पाणीसाठा झाला आहे. एक जूनपासून सुरू झालेल्या या जलवर्षात आत्तापर्यंत कोयना (६१) ४५४९ मिलिमीटर, नवजा (६९) ५४०८ मिलिमीटर, महाबळेश्वर (४९) ५१६९ मिलिमीटर पावसाची नोंद झाली आहे. धरणातील पाणीपातळी 2154.4 फूट व 656.641 मीटर इतकी झाली आहे.  पाऊस असाच सुरू राहिल्यास धरणाच्या वक्र दरवाजातून पुन्हा पाणी सोडावे लागणार आहे.
      दरम्यान अपेक्षित पाऊस पुन्हा सुरू झाल्याने शेतकरी वर्ग सुखावला आहे. याशिवाय कोयना धरण पूर्ण क्षमतेने भरण्यासाठी केवळ ११.८० टीएमसी पाण्याची गरज आहे. सध्या धरणात अपेक्षित असा पाणीसाठा झाल्याने वर्षभरासाठीची पिण्याच्या पाण्याची व शेतीच्या पाण्याची चिंता मात्र मिटली आहे.  गेल्या दोन दिवसांपासून पाटणसह परिसरात दिवस-रात्र पाऊस पडत असल्याने हवामानात प्रचंड गारठा निर्माण झाला आहे. सर्वत्र पाणीच पाणी झाले आहे. पावसाच्या प्रतीक्षेत असलेल्या शेतकऱ्यांची चिंता आता मिटली आहे.