सातारा : सातारा शहरात बकासुर टोळीने मांडलेल्या उच्छादानंतर पोलीस अधीक्षक अजयकुमार बन्सल यांनी कठोर पाऊले उचलली आहेत. या टोळीतील ७ जणांना सातारा जिल्ह्यातून एक वर्षाकरिता तडीपार करण्यात आले आहे. यामध्ये टोळी प्रमुख यश नरेश जांभळे (वय २१, रा.झेडपी कॉलनी, शाहूपुरी, सातारा), आदित्य जयेंद्र गोसावी (वय २१, रा.शुक्रवार पेठ, सातारा), विशाल राजेंद्र सावंत (वय २०, रा. ५०१ मंगळवार पेठ,सातारा), साहिल जमीर जमादार (वय २१, रा.२५२ बुधवार पेठ, सातारा), विजय विनोद कांबळे (वय २३, रा. २६३ बुधवार पेठ,सातारा), प्रज्वल प्रवीण गायकवाड (वय २४, रा. अंजली कॉलनी, शाहूपुरी,सातारा), शिवम संतोष पुरीगोसावी (वय १८, रा.गडकर आळी, सातारा) या सात जणांचा समावेश आहे. या सर्वांविरुद्ध सातारा शहर पोलीस ठाण्याचे पोलीस निरीक्षक भगवान निंबाळकर यांनी हद्दपार प्रस्ताव सादर केला होता. याची चौकशी व सुनावणी होऊन या टोळीस पोलीस अधीक्षक अजयकुमार बन्सल यांनी सातारा जिल्हा हद्दीतून १ वर्षाकरिता हद्दपार केले आहे.