महाबळेश्वर : महाबळेश्वर शहरातील एल. सी. डिसोजा रोडवर अनेक वर्षांपासून भरत असलेला ऐतिहासिक आठवडे बाजार आता अधिक नियोजनबद्ध आणि सुविधायुक्त पद्धतीने छत्रपती संभाजी महाराज पार्किंग येथे स्थलांतरित करण्यात येणार आहे. शहरातील वाढती वाहतूक कोंडी, पर्यटकांची गैरसोय आणि बाजार व्यवस्थापन अधिक प्रभावी करण्याच्या उद्देशाने महाबळेश्वर नगरपरिषदेकडून हा महत्त्वपूर्ण निर्णय घेण्यात आला आहे.

   या पार्श्वभूमीवर नगराध्यक्ष सुनील शिंदे, मुख्याधिकारी योगेश पाटील, नगरसेवक, पालिका अधिकारी तसेच व्यापारी प्रतिनिधींनी नव्या जागेची प्रत्यक्ष पाहणी करून आवश्यक सुविधांचा आढावा घेतला. बाजार सुरू करण्यापूर्वी परिसराची संपूर्ण स्वच्छता करून आवश्यक पायाभूत सुविधा तातडीने उपलब्ध करून देण्याचे निर्देश मुख्याधिकारी योगेश पाटील यांनी संबंधित विभागांना दिले.

  एल. सी. डिसोजा रोडवर आठवडे बाजार भरत असल्यामुळे प्रत्येक आठवड्यात मोठ्या प्रमाणावर वाहतूक कोंडी होत होती. याचा फटका स्थानिक नागरिकांसह पर्यटकांनाही बसत होता. नवीन ठिकाणी बाजार भरल्यामुळे शहरातील वाहतूक अधिक सुरळीत होण्यास मदत होणार असून नागरिक आणि पर्यटकांना दिलासा मिळणार आहे.

 नगरपरिषदेच्या नियोजनानुसार व्यापाऱ्यांना शिस्तबद्ध पद्धतीने गाळे उपलब्ध करून दिले जाणार आहेत. तसेच पिण्याच्या पाण्याची व्यवस्था, स्वच्छता, कचरा व्यवस्थापन आणि अन्य मूलभूत सुविधा उपलब्ध करून बाजार अधिक सुसज्ज करण्यावर भर दिला जाणार आहे. बाजार आणि पार्किंगची सुविधा एकाच ठिकाणी उपलब्ध होणार असल्याने पर्यटकांनाही मोठी सोय होणार आहे.

 पाहणी दौऱ्यात शहरातील प्रमुख नगरसेवक, पालिका अधिकारी आणि व्यापारी प्रतिनिधी उपस्थित होते. जागेची स्वच्छता, प्राथमिक नियोजन आणि आवश्यक सुविधा पूर्ण झाल्यानंतर आठवडे बाजार नव्या ठिकाणी अधिकृतपणे सुरू करण्यात येणार असल्याची माहिती नगरपरिषदेच्या वतीने देण्यात आली.