सातारा न्यूज / बापू वाघ ( वाई )
सहकारात गावाचा विकासात्मक बदल करण्याची ताकद असते परंतु सोबत अध्यात्मिक व धार्मिक अधिष्ठान असेल तर तो कुटुंबातील सदस्यसह समाजाचा आनंद ठरतो यासाठी संतांनी व थोर नेत्यांनी जपलेली सहकार चळवळ जपू या असे प्रतिपादन भुईंज प्रेस क्लवचे संस्थापक पत्रकार जयवंत पिसाळ यांनी केले.
          खडकी ता. वाई येथे सुंदरनाथ ग्रामीण बिगर शेती सहकारी पतसंस्था मर्यादित खडकी यांच्या सभासदांना लाभांश वाटप व परिसंवाद मेळाव्यात प्रमुख पाहुणे म्हणून प्रेस क्लवचे संस्थापक पत्रकार जयवंत पिसाळ बोलत होते. अध्यक्षस्थानी भुईज जि.प. गटाचे नेते पै. जयवंत पवार होते. तर प्रमुख उपस्थितीत संस्थेचे संस्थापक चेअरमन ह. भ. प. अरविंदबुवा शिंगटे होते.
      यावेळी बोलताना पत्रकार जयवंत पिसाळ पुढे म्हणाले की कृष्णा नदीच्या काठावर वसलेले खडकी गाव समृद्ध वारसा शेती व्यवसाय जोपासत गुण्यागोविंदाने नांदत आहे. इथली विकासाची वाट सहकारातून सुरू झाली. यातूनच २१ वर्षापुर्वी संस्थापक ह. भ. प. अरविंदबुवा शिंगटे यांनी स्थापन केलेली सुंदरनाथ ग्रामीण बिगर शेती सहकारी पतसंस्था प्रत्येकाला मदत करत बचतीचा मंत्र जोपासत लहान गावात सुद्धा एक कोटीच्यावर ठेवी गोळा करते त्यांनी जपलेला विश्वास सभासदांना नक्कीच कौतुकास्पद आहे. असे ही ते यावेळी म्हणाले. म्हणूनच सहकारात गावाचा विकासात्मक बदल करण्याची ताकद असते.
    तर यावेळी अध्यक्षस्थानावरून बोलताना पै. जयवंत पवार म्हणाले की खडकी गावात सहकार शेती यांना धार्मिक चळवळीचे अधिष्ठान आहे त्यामुळे इथे पारदर्शकता असून संस्था चालवणारे पदाधिकारी संचालक यांचे योगदान अभिमानास्पद आहे. त्यांनी जपलेला विश्वास व सभासदांच्या इच्छा नक्कीच नव्या पिढीला मार्गदर्शक ठरतील असे ही ते म्हणाले.
        कार्यक्रमास किसनवीर कारखान्याचे संचालक संजय कांबळे, सरपंच सौ. सरोज शिंगटे, संस्थेचे जेष्ठ संचालक बाळासाहेब शिंगटे पाटील, माजी सरपंच प्रकाश शिंगटे, सोसायटी माजी चेअरमन नंदकुमार शिंगटे व सभासद संचालक उपस्थित होते. सचिव संजय सुर्वे यांनी सुत्र संचालन केले तर आभार नंदकुमार शिंगटे यांनी मानले.