सातारा- नागपूर व अकोला येथे नुकत्याच पार पडलेल्या राज्य अजिंक्यपद बॉक्सिंग स्पर्धेत सातारा जिल्हा महिला संघाने १ सुवर्ण, २ रौप्य आणि २ कास्य पदके पटकावून तृतीय स्थान पटकाविले तर पुरुष गटात एका रौप्य पदकावर समाधान मानावे लागले. दरम्यान, जानेवारी महिन्यात होणा-या महाराष्ट्र मिनि ऑलिंपिक स्पर्धेसाठी जिल्हयातील ७ खेळाडूंची निवड झाली आहे.
 
महाराष्ट्र बॉक्सिंग संघटनेतर्फे नागपूर येथे वरिष्ठ महिलांच्या राज्य अजिंक्यपद बॉक्सिंग स्पर्धेत रिशिका होले हिने ५०-५२ किलो गटात सुवर्ण, यशश्री धनवडे हिने ४८-५० किलो व वेदांतीका पोतेकर हिने ७५-८० किलो वनज गटात रौप्य पदक तर मृणाल जाधव हिने ५४-५७ किलो व सोनिका सांगवान हिने ६० - ६३ किलो वनजगटात कास्यपदक पटकावून सातारा जिल्हा संघाला तृतीय स्थानावर पोहचविले. अकोला येथे झालेल्या वरिष्ठ पुरुष संघास मात्र १ रौप्य पदकावर समाधान मानावे लागले. यात अशुतोष भारती याने ५१-५४ किलो गटात रौप्यपदक पटकाविले. 
वरिल स्पर्धेतील कामगीरीवर जानेवारी महिन्यात होणा-या महाराष्ट्र मिनि ऑलिंपिक स्पर्धेत यशश्री धनवडे, गीता बासगी, रिशिका होले, सोनिका सांगवान, मृणाल जाधव, वेदांतीका पोतेकर व अशुतोष भारती या खेळाडूंची निवड झाली आहे. सर्व खेळाडूंचा व संघाचे प्रशिक्षक सागर जगताप यांचा जिल्हा बॉक्सिंग संघटनेतर्फे अध्यक्ष राजेंद्र चोरगे यांनी सत्कार करून पुढील स्पर्धेसाठी शुभेच्छा दिल्या. यावेळी योगेश मुंदडा, मंगेश जाधव, रविंद्र होले उपस्थित होते.