तरुणांचा सहभाग पतसंस्था व्यवहारात वाढावा, युवावर्ग पतसंस्थेकडे आकर्षित झाल्यास तो दीर्घकाळचा ग्राहक राहणार आहे यासाठी छत्रपती संभाजी महाराज सहकारी पतसंस्थेने आधुनिक तंत्रज्ञानाचा वापर करून मोबाईल बँकींग सेवा व क्यूआरकोड सुविधा सुरू केलेली आहे. याशिवाय ही संस्था सर्वांना आपली वाटावी यासाठी सामाजिक बांधिलकीतून तळागाळातील जनतेसाठी कमी व्याजदराच्या विविध कर्ज योजना सुरू करण्यात आल्या आहेत अशी माहिती संस्थापक रामभाऊ लेंभे यांनी दिली.
        पिंपोडे बुद्रुक ता.कोरेगाव येथील छत्रपती संभाजी महाराज सहकारी पतसंस्थेच्या मुख्यालयात आयोजित पत्रकार परिषदेत ते बोलत होते. महिला स्वयंरोजगार कर्ज योजनेतून संस्थेने दोन महिन्यांत ६ कोटींचे वाटप केले असून २५ ते ४० वयोगटातील युवकांना मोबाईल, लँपटाँप खरेदीसाठी कर्जवाटप करण्यात येत आहे जेणेकरून पतसंस्थेमध्ये तरुण आला पाहिजे असे संस्थापक लेंभे यांनी सांगितले.
      दारिद्र्यरेषेखालील महिलांसाठी कमी व्याजदरात सोने २ तोळेपर्यंत  मनीमंगळसूत्र खरेदी योजना सुरू करण्यात येणार आहे.संस्था जशी मोठ्या कर्जदारांना कर्जवाटप करते तशी लहान कर्जदारांनाही प्राधान्य दिले जाते.छत्रपती संभाजी महाराज पतसंस्था दारोदार पोहोचविण्यासाठी मायक्रोफायनान्सद्वारे छोट्या छोट्या कर्जदारांना वाटप करून सामान्य माणसासाठी ही पतसंस्था कार्यरत आहे हे धोरण संस्थेने अवलंबले असून त्यास यश मिळत आले आहे असे सांगून संस्थापक लेंभे म्हणाले,संस्थेकडे ३० सप्टेंबरअखेर ठेवी ५३२ कोटी ८० लाख,कर्जवाटप ३७० कोटी २० लाख,भागभांडवल २५ कोटी ६४ लाख,गुंतवणूक १६२ कोटी ५३ लाख,खेळते भांडवल ६२२ कोटी ६७ लाख,संमिश्र व्यवसाय ९०३ कोटी अशी समाधानकारक आर्थिक स्थिती आहे. कोरोना संपताच संस्थेचे व्यवहार गतीमान झाल्याने ३१ मार्चनंतर सर्वच बाबींमध्ये वाढ झाली आहे.
------------------------------