सातारा : जिल्ह्यातील अनेक साखर कारखाने तसेच उद्योग राजरोस प्रदूषण कायद्याचे उल्लंघन करीत असताना त्याबाबत हजारो तक्रारी अर्ज दाखल झाले. तरी देखील त्यावर कोणतीच कारवाई न करणाऱ्या प्रदूषण महामंडळाचा मस्तवाल अधिकारी भड आणि यशराज इथेनॉल कंपनीवर कारवाई केलीच पाहिजे, अशी मागणी रयत क्रांती संघटनेचे युवा आघाडी जिल्हाध्यक्ष प्रकाश उर्फ सोनू साबळे यांनी केली आहे. तसेच येत्या आठ दिवसात कारवाई न झाल्यास गनिमी काव्याने आंदोलन करण्याचा इशारा देखील साबळे यांनी दिला आहे.

सातारा तालुक्यातील यशराज इथेनॉल कंपनी राजरोस प्रदूषण कायद्याचे उल्लंघन करत आहे. त्यावर रयत क्रांती संघटनेने अनेकदा निवेदन प्रदूषण महामंडळ सातारा कार्यालयाला दिले. त्यावर भड यांनी कोणतीही कारवाई केली नाही. उलट कंपनीचे काम उत्तम सुरू असल्याचा अप्रत्यक्ष दाखला भड कोणत्या हेतूने देत आहेत ? तसेच कंपनीवर कारवाई करण्याचे सोडून उलट शेतकऱ्यांना धमकवण्याचे भड करत आहेत. त्यामुळे आता कंपनी आणि भड यांच्या कारभाराची सखोल चौकशी आता जिल्हाधिकारी व पालकमंत्री यांनी केली पाहिजे. अन्यथा येत्या दिवसात रयत क्रांती संघटना कोणताही इशारा न देता भड नामक अधिकारी व कंपनीच्या विरोधात लोकशाही मार्गाने परंतु गनिमी काव्याने आंदोलन करणार असल्याचे साबळे यांनी सांगितले आहे