सातारा : अजिंक्यतारा माध्यमिक व उच्च माध्यमिक विद्यामंदिर शाहूनगर शेंद्रे येथील इ. १२ वीचा विद्यार्थी ओम अनिल कदम याने गुजरात मधील नाडियाड येथे झालेल्या शालेय राष्ट्रीय आर्चरी स्पर्धेच्या कंपाउंड या प्रकारांमध्ये सुवर्णपदक मिळवले.

ओम कदम हा इ. सहावी पासून आर्चरी या क्रीडा प्रकाराचे प्रशिक्षण घेत असून त्याने आजवर विविध स्पर्धांमध्ये सहभागी होऊन यश संपादन केलेले आहे. त्याने शालेय राष्ट्रीय आर्चरी क्रीडा स्पर्धेत केलेली कामगिरी खरोखरच अभिमानास्पद आहे. या यशाबद्दल त्याचे अजिंक्यतारा शिक्षण संस्थेचे मार्गदर्शक आ. श्रीमंत छ. शिवेंद्रसिंहराजे भोसले यांनी कौतुक व अभिनंदन केले, तसेच भावी वाटचालीस शुभेच्छा दिल्या.
ओम कदम याचा संस्थेचे अध्यक्ष यशवंत हरी साळुंखे, उपाध्यक्ष नामदेवराव सावंत, सर्जेराव सावंत, संचालक सुनील निकम, इंद्रजीत नलवडे व संस्थेचे सेक्रेटरी जिवाजी मोहिते या सर्वांनी त्याचे व त्याचे क्रीडा प्रशिक्षक प्रवीण सावंत यांचे अभिनंदन करून भावी वाटचालीसाठी शुभेच्छा दिल्या.

यावेळी त्याला मार्गदर्शन करणारे क्रीडा शिक्षक पांडुरंग कणसे व त्याच्या कुटुंबीयांचाही सत्कार करण्यात आला. ओमने आपले मनोगत व्यक्त करताना आपला खडतर प्रवास विषद केला. पांडुरंग कणसे यांनी मनोगत व्यक्त केले. सर्व शिक्षकांनी कार्यक्रम यशस्वी होण्यासाठी परिश्रम घेतले. विद्यालयाचे प्राचार्य शिवाजी मोरे यांनी प्रास्ताविक केले. संतोष मोरे यांनी सूत्रसंचालन तर, सौ धनश्री शिंदे यांनी आभार मानले.