मेढा : श्री क्षेत्र अक्कलकोट निवासी श्री स्वामी समर्थ अन्नछत्रमंडळातर्फे काढण्यात येणाऱ्या " भिऊ नकोस मी तुझ्या पाठीशी आहे " असा आशीर्वाद देऊन सदमार्गावर आणि नितीमत्तेने वागणाऱ्या भक्ताचे कल्याण करणाऱ्या गुरू दत्तांचे चौथे अवतार श्री स्वामी समर्थ महाराज पादुका व पालखी सोहळा परिक्रमेचे गुरूवार दि. १५ फेब्रुवारी रोजी मेढा शहरात सकाळी १० वाजता आगमन होत असून पादुका दर्शनाचा लाभ स्वामी भक्तांनी घ्यावा असे आवाहन स्वामी सेवेकारांच्या वतीने करण्यात आले आहे.

           अक्कलकोट येथील श्री स्वामी समर्थ अन्नछत्र मंडळाच्या वतीने ज्या स्वामी भक्तांना स्वामींच्या दर्शनासाठी अक्कलकोटला जाता येत नाही त्यांना स्वामी दर्शन व्हावे यासाठी संपूर्ण महाराष्ट्रात स्वामींच्या पादुका व पालखी सोहळा गेल्या अनेक वर्षापासून सुरू आहे.यावर्षी मेढा येथे श्री स्वामी समर्थ महाराज पालखी व पादुकांचे आगमन सकाळी १०.०० वा. छ.शिवाजी महाराज चौकात होणार आहे.आगमन झाल्यानंतर मान्यवरांच्या हस्ते स्वागत व पूजन होईल. पादुका पुजन झाल्यावर ढोल ताशांच्या गजरात मेढा शहरातून पालखी पादुका मिरवणूक काढण्यात येणार आहे दुपारी ११.३० वा हार्डवेअरचे व्यापारी सुधाकर मोरे यांच्या निवासस्थानी पालखी येईल त्या ठिकाणी अभिषेक व पूजा झाल्यानंतर आरती होईल 

            आरती नंतर भाविकांना स्वामींचे दर्शन घेता येईल दुपारी ३ वाजता पालखी परिक्रमा सातारला मार्गस्थ होणार आहे तरी मेढा पंचक्रोशीतील स्वामी भक्तांनी दर्शनाचा लाभ घ्यावा असे आवाहन स्वामी समर्थ भक्त मंडळींकडून करण्यात आले आहे.