सातारा  : यादवगोपाळ पेठेतील बोकील हॉस्पिटलच्या शेजारून पायी चालत निघालेल्या 65 वर्षीय वॉचमनचा मोबाईल व 2 हजार रूपये हिसकावून नेल्याची घटना घडली. आनंद गुंडू माने(रा. मंगळवार पेठ सातारा) असे त्यांचे नाव आहे. त्यांनी शाहूपुरी पोलीस ठाण्यात गुन्हा दाखल केला आहे. शहर व शाहूपुरी हद्दीत जबरी चोरीचे प्रकार वाढत असताना पोलिसांकडून ठोस कारवाई होत नसल्याने अज्ञात चोरटय़ाला पाठबळ मिळत आहे.  
पोलिसांनी दिलेली माहिती अशी, आनंद माने हे वॉचमनचे काम करतात. सोमवार दि. 1 ऑगस्ट रोजी 11 वाजण्याच्या सुमारास यादव गोपाळ पेठेतून पायी चालत येत होते. यावेळी बोकील हॉस्पिटलच्या शेजारी आल्यावर पाठीमागून दुचाकीवर अज्ञात आले. त्यांनी आनंद यांच्या हातातील मोबाईल हिसकवला. तसेच त्याच्या खिशात हात घालून 2 हजार रूपये हिसकावून पोबारा केला. अचानक घडलेल्या या घटनेमुळे आनंद चांगलेच घाबरले. त्यांनी आरडाओरडा केला. परंतु कोणतीही मदत मिळाली नाही. यामुळे त्यांनी शाहूपुरी पोलीस ठाण्यात जावून अज्ञाताविरूद्ध गुन्हा दाखल केला आहे. या गुह्याचा अधिक तपास सहायक पोलीस निरीक्षक यादव करत आहेत.