सातारा :  सातारा जिल्ह्यात लाचलुचपत प्रतिबंधक विभागाने मोठी कारवाई करत तहसील कार्यालयातील पुरवठा निरीक्षण अधिकाऱ्यास रंगेहात पकडले आहे. या कारवाईमुळे प्रशासनात खळबळ उडाली आहे.

मिळालेल्या माहितीनुसार, आनंद कैलास शिंदे, पुरवठा निरीक्षण अधिकारी, तहसील कार्यालय कोरेगाव यांनी एका तक्रारदाराकडून २ लाख रुपयांची लाच मागितली होती. तक्रारदार हा भारत गॅस एजन्सीचा व्यावसायिक असून, त्याच्या एजन्सीच्या गोडाऊनची वारंवार तपासणी टाळण्यासाठी व तक्रारदार यांच्या गॅस एजन्सीवर असलेल्या तक्रारी वर कारवाई न करण्यासाठी ही लाच मागण्यात आल्याचे समोर आले आहे. ही कारवाई टाळण्यासाठी 31 मार्च रोजी 25000 दिले होते उरलेल्या रकमेसाठी लोकसेवक आनंद शिंदे मागणी करत होते त्यामुळे तक्रारदार यांनी एक एप्रिल रोजी याबाबत लाचलुचपत प्रतिबंधक विभाग, सातारा येथे तक्रार दाखल केली. त्यानुसार ४ एप्रिल रोजी पडताळणी करण्यात आली असता आरोपीने १ लाख २५ हजार रुपयांवर तडजोड केल्याचे निष्पन्न झाले.

यानंतर ६ एप्रिल रोजी सापळा रचण्यात आला. या सापळ्यात आरोपी यांचा साथीदार अवधूत दिलीप कालेकर याने तक्रारदाराकडून १ लाख २५ हजार रुपये स्वीकारताना रंगेहात पकडण्यात आले.

ही कारवाई कोरेगाव येथील जनता सहकारी बँक परिसरात करण्यात आली. दोन्ही आरोपींविरुद्ध कोरेगाव पोलीस ठाण्यात भ्रष्टाचार प्रतिबंधक अधिनियम १९८८ अंतर्गत गुन्हा दाखल करण्याची प्रक्रिया सुरू आहे.

या कारवाईमुळे जिल्ह्यातील शासकीय यंत्रणेत खळबळ उडाली असून, भ्रष्टाचाराविरोधात कठोर कारवाईचा संदेश देण्यात आला आहे.