सातारा : पोवई नाका येथे गुरुवारी सांयकाळी झालेला राडा जुन्या वादातून झाला असल्याचे समोर आले असून याप्रकरणी एकूण दोन गुन्हे दाखल झाले आहेत. जबरी चोरीसह पोलिसांच्यावतीनेही याप्रकरणी एक तक्रार देण्यात आली आहे.

याबाबत पोलिसांनी दिलेली माहिती अशी, पहिली तक्रार ऋषभ राजेंद्र जाधव, योगेश देवकर, राजेंद्र जाधव, बंटी माने, ऋषीकेश पांचागणे अनोळखी दोन यांच्या विरुध्द अक्षय सुनील मांढरे (वय 27, रा. चिमणपुरा पेठ, सातारा) यांनी पोलीस ठाण्यात तक्रार दिली आहे. तक्रारदार ऋषभ हे मित्रासोबत बोलत पोवई नाका येथे थांबले असताना संशयित टोळक्याने त्यांच्यावर जुन्या वादातून लाथा-बुक्क्यांनी व दगडाने मारहाण करत जखमी केले. तसेच यावेळी संशयित टोळक्याने त्यांच्या खिशातील 25 हजार रुपये व तीन तोळ्याची सोन्याची चेन जबरदस्तीने चोरुन नेली असल्याचे तक्रारीत म्हटले आहे.

दुसरी तक्रार अक्षय सुनील मांढरे (वय 26, रा.चिमणपुरा पेठ), ऋषभ जाधव, योगेश देवकर व इतर अनोळखी तिघे यांच्या विरुध्द पोलीस तानाजी भोंडवे यांनी तक्रार दिली आहे. गुरुवारी सांयकाळी सव्वा सहा वाजता एकमेकांना मारहाण करत होते. पोलिसांनी त्यांना ताब्यात घेवून चौकशी केली असता जुन्या वादातून मारहाण झाल्याचे समोर आले. त्यानुसार पोलिसांनी गुन्हा दाखल केला.