सातारा : सातारा जिल्हा मध्यवर्ती सहकारी बँकेस नॅशनल फेडरेशन ऑफ को-ऑपरेटिव्ह बँक या संस्थेच्या वतीने सर्वोत्कृष्ट बैंक हा पुरस्कार देऊन गौरविण्यात आल्याने बँकेचे मुख्य कार्यकारी अधिकारी डॉ. राजेंद्र सरकाळे यांचा सत्कार सातारा जिल्हा गटसचिव संघटनेच्या वतीने करणेत आला. यावेळी सातारा जिल्हा संघटनेचे अध्यक्ष संदीप कदम, जिल्हा केडर कार्यालय अधीक्षक मकरंद भोसले, उपाध्यक्ष गोपाळ बेलोशे, केडर प्रतिनिधी कल्याण भोसले, सरचिटणीस दिपक कचरे, चेअरमन सातारा जिल्हा गटसचिव पतसंस्था दादासाहेब माने, धनाजी शिंदे, विकास भोसले, विकास गायकवाड, रामदास पार्टे यांची प्रमुख उपस्थिती होती.

     यावेळी मुख्य कार्यकारी अधिकारी डॉ. सरकाळे म्हणाले, सातारा जिल्हा बँकेने शेतकरी बांधव केंद्रस्थानी ठेवून विविध कर्जयोजना विकास सेवा सोसायटीच्या माध्यमातून राबविण्यात येत आहेत. यामध्ये सेवा सोसायट्‌यांमध्ये कार्यरत असणाऱ्या गटसचिवांचे योगदान मोलाचे आहे. जिल्हा केडर व जिल्हास्तरीय सचिव एकत्रित करण्यासाठी शासनस्तरावर बँकेचे प्रयत्न असून लवकरच एक नवीन यंत्रणा कार्यान्वित करण्यात येणार असे सूचक वक्तव्य त्यांनी यावेळी केले. संघटनेचे अध्यक्ष संदीप कदम म्हणाले, सातारा जिल्हा बँकेच्या वतीने शेतकरी व सेवा सोसायटीच्या बाबतीत जे धोरण राबविले जाईल त्याला जिल्ह्यातील सर्व गटसचिव प्रभावीपणे व ठाम बँकेच्या पाठीशी खंबीरपणे साथ देणार असल्याची ग्वाही दिली. जिल्हा केडर व जिल्हास्तरीय सचिवांचा प्रश्न मार्गी लावण्याची मागणी केली.