कोलकाता : विराट काहलीच्या शतकाने भारताच्या विजयाला एक अनोखे कोंदण लावले. कोहलीच्या शतकाच्या जोरावर भारताने प्रथम फलंदाजी करताना ३२६ धावांचा डोंगर उभारला होता. या आव्हानाचा पाठलाग करताना दक्षिण आफ्रिकेची ससेहोलपट झाली आणि त्यामुळे भारताला या सामन्यात मोठा विजय साकारता आला. भारताने यावेळी दक्षिण आफ्रिकेवर २४३ धावांनी दणदणीत विजय साकारला.
रोहित शर्माने भारताला धडेकाबाज सुरुवात करून दिली. पण त्याचे अर्धशतक थोडक्यात हुकले. रोहित बाद झाला आणि फलंदाजीला आला तो विराट कोहली. कोहली आणि गिल या जोडीने गेल्या सामन्यात धडाकेबाज फटकेबाजी केली होती. पण या दोघांचेही शतक हुकले होते. त्यामुळे हे दोघे या सामन्यात आपेल शतक पूर्ण करणार का, याची उत्सुकता सर्वांनाच होती. कोहलीच्या खेळात आत्मविश्वास भरलेला पाहायला मिळाला. पण यावेळी गिलला मात्र कोहलीला जास्त वेळ साथ देता आली नाही. कारण गिल यावेळी २३ धावांवर बाद झाला. गिल बाद झाला आणि कोहलीला साथ देण्यासाठी यावेळी श्रेयस अय्यर मैदानात आला. त्यानंतर कोहली आणि श्रेयस यांनी आपली अर्धशतके पूर्ण केली आणि त्यांनी शतकाच्या दिशेने कूच करायला सुरुवात केली. कोहली आणि अय्यर यांनी सत्तरीमध्ये प्रवेश केला आणि ते शतकासमीप जात होते. पण त्याचवेळी भारताला धक्का बसला तो श्रेयस अय्यरच्या रुपात. कारण श्रेयस ७७ धावांवर बाद झाला आणि भारताला तिसरा धक्का बसला. लोकेश राहुल आणि सूर्यकुमार यादव यावेळी मोठी खेळी साकारू शकले नाही. पण विराट कोहलीने मात्र रवींद्र जडेजाबरोबर खेळताना धमाकेदार फटकेबाजी केली आणि त्यामुळे भारताला ३०० धावांचा पल्ला गाठता आला. जडेजाच्या साक्षीने यावेळी कोहलीने आपेल ४९ वे वनडे शतक पूर्ण केले.
भारातच्या आव्हानाचा पाठलाग करताना दक्षिण आफ्रिकेच्या संघाला दुसऱ्याच षटकात मोठा धक्का बसला. त्यानंतर दक्षिण आफ्रिकेचा संघ या सामन्यात सावरू शकला नाही. भारताने एकामागून एक त्यांना धक्के दिले आणि त्यांचा अर्धा संघ ४० धावांत बाद झाला. त्यानंतर दक्षिण आफ्रिका हा सामना जिंकणार नाही हे स्पष्ट झाले होते.