फलटण : सातारा जिल्ह्यातील फलटण शहर परिसरात शस्त्रांचा वापर करून मारामारी, मालमत्तेविरुद्ध गुन्हे, चोरी तसेच दहशत निर्माण करणाऱ्या सराईत गुन्हेगारांविरोधात सातारा पोलिसांनी मोठी कारवाई केली आहे. या कारवाईत दोघा आरोपींना संपूर्ण सातारा जिल्हा तसेच पुणे जिल्ह्यातील बारामती, पुरंदर तालुका आणि सोलापूर जिल्ह्यातील माळशिरस तालुका हद्दीतून दोन वर्षांसाठी हद्दपार करण्यात आले आहे.

ही कारवाई सातारा पोलीस प्रशासनाने महाराष्ट्र पोलीस कायद्यानुसार केली आहे. पोलिसांनी दिलेल्या माहितीनुसार, टोळीप्रमुख अनिकेत सुभाष बनसोडे (वय २२, रा. स्वामी समर्थ मंदिर रोड, मलटण, फलटण) तसेच त्याचा साथीदार अर्जुन राजू जाधव (वय १९, रा. स्वामी समर्थ मंदिर रोड, मलटण, फलटण) हे अवैध मार्गाने दहशत निर्माण करून दुखापत पोहोचवणे, चोरी करणे, अवैध शस्त्र बाळगणे यांसारख्या गुन्ह्यांमध्ये वारंवार सहभागी असल्याचे निष्पन्न झाले होते.

फलटण शहर पोलीस ठाण्याने या दोघांविरुद्ध हद्दपारीचा प्रस्ताव सादर केला होता. त्यानुसार चौकशी करून सक्षम प्राधिकाऱ्यांनी दोन्ही आरोपींना दोन वर्षांसाठी हद्दपार करण्याचे आदेश दिले.

सातारा जिल्ह्यात शांतता व सुव्यवस्था अबाधित ठेवण्यासाठी भविष्यातही सराईत गुन्हेगारांविरुद्ध कठोर कारवाई सुरूच राहणार असल्याचा इशारा पोलिस अधीक्षकांनी दिला आहे