सातारा : फळणी, ता.जावली येथील संजय गणपत शेलार (वय 32) यांच्या खून प्रकरणी अरुण कापसे यांना गुरुवारी सांयकाळी अटक करण्यात आली. 15 दिवसांपूर्वी मेढा पोलीस ठाण्यात याप्रकरणी गुन्हा दाखल झाला आहे. याबाबत अधिक माहिती अशी, संजय शेलार यांना मारहाण झाल्यानंतर सकाळी त्यांचा मृतदेह अंधारी गावच्या हद्दीत आढळून आला. मेढा पोलिसांनी घटनास्थळाचा पंचनामा करुन मृतदेह शवविच्छेदनासाठी पाठवला असता मारहाणीमुळे त्यांचा मृत्यू झाल्याचे समोर आले. यामुळे शेलार यांना मारणारे मारेकरी कोण? असा सवाल यानंतर उपस्थित झाला. मेढा, वाई पोलीस तपास करत असताना त्यांना यश येत नव्हते. 

  यामुळे फळणीचे ग्रामस्थ व शेलार कुटुंबिय आक्रमक झाले होते. मारेकर्‍यांचा तात्काळ शोध घ्यावा, यासाठी निवेदनेही देण्यात आली होती. यावेळी ग्रामस्थांनी पोलीस अधिकाऱ्यांची भेट घेत संजय शेलार यांच्या मारेकऱ्यांना तात्काळ अटक करा, अशी मागणी केली होती. शेलार यांचा मारेकरी हा राजकीय वरदहस्ताने मोकाट असून पोलीस जाणीवपूर्वक अटक करण्यास विलंब करत असल्याचा आरोप ही ग्रामस्थांनी केला होता. 

 दरम्यान, संजय शेलार खून प्रकरणी पोलिसांचा प्राथमिक तपास सुरु असताना गुरुवारी सकाळी ‘जलसागर’चे अरुण कापसे यांना पोलिसांनी ताब्यात घेतले. सुमारे 4 तास चौकशी केल्यानंतर सांयकाळी त्यांना अटक केली. अरुण कापसे यांच्या अटकेनंतर कण्हेर धरणातला 'तो' मासा अखेर पोलिसांच्या गळाला लागलाच अशी चर्चा सुरु आहे.