जावली : पवारवाडी, ता. जावली येथील एका युवकाला मारहाण करुन त्याच्या मृत्यूस कारणीभूत ठरल्याप्रकरणी विरमाडे येथील आठ जणांवर गुन्हा दाखल झाला आहे. याप्रकरणी सहा जणांना अटक केली असून न्यायालयाने त्यांना १२ जूनपर्यंत पोलीस कोठडी सुनावली आहे.

गणेश बजरंग सोनवणे, सुमित जालिंदर सोनवणे, प्रथमेश जयवंत सोनवणे, अभिषेक शिवाजी सोनवणे, प्रकाश शामराव पाटील, अक्षय कमलाकर सोनवणे (सर्व रा. विरमाडे ता. वाई) अशी पोलिसांनी अटककेलेल्यांची नावे आहेत. सुरज प्रदीप शिंदे, (रा. पवारवाडी, ता. जावली    असे मृत झालेल्या युवकाचे नाव असून याप्रकरणी सुरेश मच्छिंद्र पवार (रा. पवारवाडी, ता. जावली) यांनी फिर्याद दिली आहे.

याबाबत पोलिसांनी दिलेली माहिती अशी की, सुरेश पवार यांचा भाचा सुरज शिंदे याला मारहाण झाली होती. उपचारादरम्यान त्याचा मृत्यू झाला. त्याच्या मृत्यूस कारणीभूत ठरल्याप्रकरणी आठ जणांवर खुनाचा गुन्हा दाखल झाला असून सहा जणांना अटक करण्यात आली आहे. कुणाल दिलीप गायकवाड, सुशांत उर्फ प्रणव सुनील सोनवणे हे दोन संशयित पसार असून पोलिस त्यांचा शोध घेत आहेत. अटक केलेल्या सहा जणांना न्यायालयासमोर उभे केले असता त्यांना न्यायालयाने पोलिस कोठडी दिली आहे. तपास सपोनि  तासगावकर यांच्यामार्गदर्शनाखाली सुरु आहे.