पाटण : ढेबेवाडी विभागातील एका गावात 35 वर्षीय नरधमाने 12 वर्षांच्या अल्पवयीन मुलीवर बलात्कार करून याबाबत कोणाला सांगू नको, नाही तर जिवे मारीन, अशी धमकी त्या मुलीला दिली. 

यासंदर्भात ढेबेवाडी पोलिस ठाण्यात संशयितावर ‘पोक्सो’अंतर्गत गुन्हा दाखल करण्यात आला आहे. ढेबेवाडी पोलिसांनी दिलेली माहिती अशी की, विभागातील डोंगर पठारावरील एका गावात गुरुवार, दि. 28 मे रोजी दुपारी एकच्या सुमारास पीडित मुलगी आपल्या आईला फोन करण्यासाठी गावातील आत्याच्या घराजवळ आली होती. यावेळी आत्याच्या 35 वर्षीय मुलाने घरात कोणी नसल्याचा फायदा घेत मुलीला मोबाईल बघण्याच्या निमित्ताने जवळ बोलावून घेतले व तिच्यावर अत्याचार केला. 

ही बाब कोणाला सांगायची नाही, जर सांगितलीस तर जिवे मारीन, अशी धमकी दिली. आई घरी आल्यानंतर घाबरलेल्या मुलीने ही हकीकत सांगितली. याबाबत आईने ढेबेवाडी पोलिस ठाण्यात संशयित नराधमाच्या विरोधात गुन्हा दाखल केला असून, ढेबेवाडी पोलिसांनी त्याला ताब्यात घेतले आहे. अधिक तपास स.पो.नि. प्रवीण दाईंगडे करत आहेत