सातारा : सातारा शहर आणि उपनगर परिसरात कपल कॅफेंमध्ये अश्लील प्रकार सुरु असल्याबाबत सातारा न्यूजने वेळोवेळी आवाज उठविला होता. मात्र, अशा आक्षेपार्ह कॅफेंवर सातारा पोलिसांकडून केवळ समज देण्याची कारवाई करण्यापलीकडे कोणतीही ठोस भूमिका घेण्यात येत नाही. यामुळेच साताऱ्यात शालेय अल्पवयीन मुला-मुलींसह युवक-युवती मोठ्या प्रमाणात शाळा व कॉलेज बुडवून कॅफेंमध्ये अश्लील चाळे करत असल्याचे आढळून येत आहे.
   आज रिपब्लिकन पार्टी ऑफ इंडिया (आठवले गट) च्या पदाधिकारी असलेल्या युवती जिल्हाध्यक्ष पूजा बनसोडे, विद्यार्थी आघाडी जिल्हाध्यक्ष वैभव गायकवाड, सातारा शहराध्यक्ष अक्षय कांबळे, तालुका युवक अध्यक्ष रवींद्र बाबर यांनी अजंठा चौक येथील प्रीती हॉटेलच्या पाठीमागे असलेल्या 'द हिडन कॅफे' या कॅफेमध्ये अश्लील प्रकार सुरु असल्याची कुणकुण लागताच त्याठिकाणी जाऊन पाहणी केली असता त्याठिकाणी अश्लील प्रकार सुरु असल्याचे समोर आले. यावेळी संतप्त झालेल्या पदाधिकाऱ्यांनी सातारा शहर पोलिसांशी संपर्क साधून घटनास्थळी बोलविले. यावेळी घटनास्थळी दाखल झालेल्या पोलिसांनी सामोपचाराची भूमिका घेतल्यानंतर सातारा न्यूजने आवाज उठविताच पोलीस अधीक्षक समीर शेख यांनी सातारा शहर पोलिसांना सूचना देताच खडबडून जागे झालेल्या पोलिसांनी कारवाईची भूमिका घेतली. यावेळी सदर कॅफेमध्ये आक्षेपार्ह स्थितीतील बैठक व्यवस्थेसह मोठ्या प्रमाणात वापरलेल्या निरोधचा अक्षरशः खच आढळून आला. यामुळे सातारा शहरातील अंधाऱ्या कॅफेंमध्ये नक्की काय चालू असेल याचा भयानक अंदाज सातारकरांना आला. यावेळी पोलिसांनी कॅफेमधील युवक-युवतींना पोलीस ठाण्यात आणून समाज देऊन सोडून देण्यात आले.
  दरम्यान, सातारा शहरात असे अनेक कॅफे असून अशा कॅफेंमध्ये मोठ्या प्रमाणात शालेय विद्यार्थ्यांसह युवक-युवतींचे अश्लील कृत्ये सुरु असतात. यापुढे अशा कॅफेंवर कारवाई न केल्यास आरपीआय स्टाईलने तोडफोड आंदोलन करू, असा इशारा पदाधिकाऱ्यांनी दिला आहे. त्यामुळे आता पोलीस कोणती भूमिका घेवून सदर कॅफे कायमस्वरूपी सील करणार का? असा सवाल आता उपस्थित होत आहे.